Nid yw cyfieithu uniongyrchol yn gweithio bob amser. Mae’r Gymraeg a’r Saesneg yn amlygu rhai gwahaniaethau ieithyddol diddorol o ran strwythur brawddegau, idiomau a gramadeg. Mae deall y newidiadau yma yn hanfodol er mwyn cyfieithu a chyfathrebu yn gywir. Dewch i edrych ar rai o’r prif wahaniaethau…

Treiglo: Newid y Llythrennau Cyntaf

Mae gan y Gymraeg dri threiglad: treiglad meddal, treiglad trwynol, a threiglad llaes. Yn syml, mae hyn yn golygu bod llythyren gyntaf gair yn newid yn dibynnu ar y cyd-destun gramadegol yn y Gymraeg. Maent yn gallu effeithio ar yr ynganiad a sillafu, ond nid ar ystyr y gair ei hun.

Cymru > “Croeso i Gymru”

Pont > “Yr hen bont”

Mae treigladau yn hollbwysig ar gyfer gramadeg ac ystyr cywir wrth ysgrifennu neu siarad Cymraeg. Gallant hefyd helpu i ddangos y berthynas ramadegol rhwng geiriau. Gall dysgu pryd a ble i ddefnyddio treigladau gymryd ymarfer, ond maent yn hynod o bwysig wrth feistroli’r iaith.

Trefn Geiriau

Mae’r Gymraeg a’r Saesneg yn wahanol o ran eu trefn geiriau arferol. Un o’r gwahaniaethau mwyaf amlwg yw bod Saesneg fel arfer yn dilyn strwythur ‘Goddrych-Berf-Gwrthrych’ (SVO), tra bod y Gymraeg yn defnyddio strwythurau ‘Berf-Goddrych-Gwrthrych’ (VSO) yn aml mewn rhai mathau o frawddegau.

Dyma enghraifft:

Saesneg: “The child (Goddrych) played (Berf) with blocks (Gwrthrych)”

Cymraeg: “Chwaraeodd (Berf) y plentyn (Goddrych) gyda blociau (Gwrthrych)”

Gall trefn geiriau’r Gymraeg amrywio yn dibynnu ar y math o frawddeg a’r pwyslais sy’n cael ei roi ar wahanol rannau ohoni. Mae hyn yn golygu y gall cyfieithu strwythur brawddeg yn uniongyrchol o’r Saesneg i’r Gymraeg arwain weithiau at frawddeg sy’n swnio’n annaturiol neu’n anghywir.

Y prif wahaniaeth yn yr enghraifft hon yw lleoliad y ferf ar ddechrau’r frawddeg yn y Gymraeg, tra bod y Saesneg yn dilyn y patrwm ‘SVO’ cyfarwydd. Gall trefn geiriau’r Gymraeg fod yn fwy hyblyg mewn rhai cyd-destunau, a gall gwahanol strwythurau newid trefn y geiriau o fewn brawddeg.

Dim Cyfwerth Uniongyrchol i Atebion ‘Yes’ a ‘No’

Yn Saesneg, gallwn ateb y rhan fwyaf o gwestiynau gyda ‘yes’ neu ‘no’ syml. Yn y Gymraeg, ar y llaw arall, gall yr ateb priodol ddibynnu ar y ferf a ddefnyddir yn y cwestiwn.

Saesneg: “Are you going on holiday?” >Yes / No

Cymraeg: “Wyt ti’n mynd ar dy wyliau?” > Ydw / Nac ydw

Er bod ‘ie/ia’ a ‘na’ yn bodoli, nid ydynt fel arfer yn cael eu defnyddio i ateb cwestiynau yn yr un ffordd ag y defnyddir ‘yes’ a ‘no’ yn Saesneg. Oherwydd bod y Gymraeg yn dilyn y system hon, mae’r ateb yn cadarnhau neu’n gwadu’r ferf neu weithred y cyfeirir ati yn y cwestiwn.

Casgliad

Yn wir, mae’r Gymraeg yn iaith brydferth ac unigryw! Mae llawer o wahaniaethau a phatrymau tebyg wrth gymharu gramadeg y Gymraeg a’r Saesneg, a dyma rai ohonynt. Gall deall y gwahaniaethau ieithyddol hyn helpu, p’un a ydych yn dysgu’r Gymraeg neu, yn syml, os oes gennych ddiddordeb yn yr iaith.

Mae’r gwahaniaethau uchod hefyd yn tynnu sylw at bwysigrwydd buddsoddi mewn gwasanaethau cyfieithu proffesiynol o safon, lle gall cyfieithwyr ystyried y gwahaniaethau ieithyddol hyn a’u hymgorffori’n naturiol yn eu cyfieithiadau.

Cysylltwch â’n tîm os oes angen help arnoch gyda’ch cyfieithiad Cymraeg:

business@bla-translation.co.uk

Rydym i gyd yn gwybod pa mor bwysig ydy gweithredu’n ddwyieithog yma yng Nghymru – er mwyn helpu busnesau i gyrraedd cynulleidfa ehangach, helpu sefydliadau cyhoeddus i gydymffurfio â deddfwriaeth berthnasol, rhoi cyfle i Gymry fanteisio ar eu hawl i ddefnyddio eu hiaith gyntaf o ddydd i ddydd.

Yng Nghymru, nid oes gofyn cyfreithiol ar sefydliadau nad ydynt yn y sector cyhoeddus i weithredu’n ddwyieithog, felly mae’n bosibl bod sefydliadau o’r fath yn ystyried gwasanaeth cyfieithu fel cost ychwanegol. O ganlyniad i hynny, mae’n bosibl y byddant yn dewis opsiynau amgen rhatach, yn hytrach na dibynnu ar gyfieithwyr go iawn. Hoffem ddangos i chi pam mae buddsoddi mewn gwasanaeth cyfieithu gan fodau dynol yn werth pob ceiniog.

1. Arbenigedd Cyfieithwyr Go Iawn

Mae’r Gymraeg yn iaith gyfoethog ag iddi ei phersonoliaeth ei hun, yn ogystal â rheolau gramadegol unigryw, y treigladau, idiomau ac amrywiadau rhanbarthol hyfryd. Mae cyfieithydd go iawn, sydd wedi treulio blynyddoedd yn perffeithio eu crefft ac yn astudio’r iaith, yn cynnig arbenigedd amhrisiadwy i’r broses gyfieithu. Mae’r arbenigwyr hyn wedi buddsoddi’n sylweddol yn eu hyfforddiant er mwyn dilysu eu gallu i gyfieithu’n fanwl gywir. Gan fod ieithoedd yn bethau ‘byw’, bydd cyfieithydd da yn gwneud eu gorau glas i fod ar flaen datblygiadau newydd er mwyn sicrhau eu bod ar eu gorau bob amser.

2. Cyfleu Cyfoeth y Gymraeg

Mae’r Gymraeg yn iaith alawol ag iddi fynegiannau barddol, trosiadau cyfoethog ac idiomau unigryw – dyma ble mae cyfieithwyr go iawn yn dangos eu gwerth. Maent yn deall arwyddocâd emosiynol a chyd-destunol testunau, a gallant gyfleu hyn yn yr iaith darged.

Os ydych eisiau cyfieithiad Cymraeg sy’n darllen fel darn Cymraeg gwreiddiol, yna bydd angen cyfieithydd go iawn arnoch.

3. Ymwybyddiaeth o Gyd-destun

Mae gan gyfieithwyr go iawn y gallu i wneud penderfyniadau gwybodus am gyd-destun, naws, ac arwyddocâd diwylliannol, gan ddefnyddio eu barn broffesiynol bob amser i addasu eu harddull ysgrifennu yn ôl y gofyn. Mae hyn yn sicrhau nad dim ond cyfleu ystyr sylfaenol mae cyfieithiad, ond ei fod yn cyd-fynd â chynildeb a chymhlethdodau’r Gymraeg.

Beth bynnag sydd ei angen arnoch – boed yn gyfieithiad o ddatganiad i’r wasg, ymgyrch marchnata, neu ddarn o lenyddiaeth, yna mae gan gyfieithydd go iawn y natur sensitif i gyfleu emosiynau a naws y testun gwreiddiol. Mae hyn yn gymorth i osgoi cyfieithiadau robotaidd, difywyd sy’n aml yn methu ag ennyn diddordeb darllenwyr yn emosiynol.

4. Rheoli Ansawdd a Chywirdeb

Gall cyfieithydd go iawn sylwi ar beryglon gramadegol posibl a gwneud cywiriadau wrth fynd, gan sicrhau bod y cyfieithiad yn gywir ac o safon uchel hefyd.

Yn fwy na hynny, gall cyfieithwyr go iawn gael cyfarfodydd gyda’u cleientiaid er mwyn trafod eu gofynion a’u nodau ac, yn bwysicach na dim, er mwyn cyfleu llais y sefydliad. Gall cyfieithydd proffesiynol sicrhau bod y cynnyrch terfynol wedi’i deilwra i ofynion a disgwyliadau’r cleient, a hynny heb gyfaddawdu ar gywirdeb.

Er ei bod hi’n hawdd cael eich denu i ddewis opsiynau rhatach, ni ellir gor-bwysleisio gwerth cyfieithwyr go iawn. Rydych yn cael mwy na geiriau am eich arian; rydych hefyd yn cael arbenigedd, dealltwriaeth ddiwylliannol, a gwybodaeth drylwyr am arwyddocâd emosiynol yr iaith.

Gadewch i ni ddangos i chi pam y dylech fuddsoddi yn eich darparwr cyfieithu.

Mae camu i farchnad newydd gyda’ch busnes yn gam hynod gyffrous. Ond mae yna lawer mwy iddi nag anfon eich cynnyrch i ben draw’r byd. Heb gyfathrebu clir a chywir, gall fod yn hynod heriol llwyddo mewn marchnad newydd. Gall gwasanaethau cyfieithu eich helpu chi i oresgyn y rhwystr cyfathrebu hwn a manteisio ar sawl budd.

1. Buddion yn ymwneud â’r cleient

Yn gyntaf oll, mae buddion yn ymwneud â’r cleient. Gall gwasanaethau cyfieithu eich helpu chi i gyfathrebu gyda’ch cwsmeriaid newydd yn eu hiaith gyntaf neu eu hiaith ddewisol. Mae ieithoedd wedi’u cysylltu’n agos â’r rhan sy’n ymdrin â systemau prosesu emosiynau yn ymennydd bodau dynol. Drwy dargedu eich marchnad newydd drwy gyfrwng eu mamiaith, byddant yn ei chael hi’n haws i ymddiried yn eich brand a chreu cysylltiad emosiynol ag ef. Gall gwasanaethau cyfieithu hefyd eich helpu chi drwy ‘leoleiddio’, sy’n golygu mewngorffori eich brand yn niwylliant y farchnad newydd drwy wneud defnydd effeithiol o iaith, addasu naws eich negeseuon, a gwneud cyfeiriadau diwylliannol sy’n cyd-fynd â’r farchnad benodol honno.

2. Buddion rheoli risg

Yn ail, mae buddion rheoli risg. O’ch dogfennau cyfreithiol, fel papurau cydymffurfiaeth, contractau a pholisïau, i’ch dogfennau logistaidd, llawlyfrau, gwybodaeth iechyd a diogelwch, gall gwasanaethau cyfieithu eich cefnogi i gyfleu gwybodaeth gymhleth i gynulleidfa nad ydynt yn arbenigwyr, gan eich helpu i osgoi dirwyon a gwarchod eich hun rhag niwed i’ch enw da.

3. Buddion twf

Yn drydydd, mae yna fuddion twf. Er mwyn sicrhau twf cyson, diogel a chynaliadwy, yn enwedig mewn marchnad newydd, mae angen defnydd proffesiynol o iaith ar fusnes er mwyn ei warchod. Gan ddefnyddio’r un gwasanaeth cyfieithu, rydych chi’n sicrhau bod tôn llais, personoliaeth a negeseuon eich brand yn gyson sy’n hanfodol i ennill ymddiriedaeth ymhlith eich sylfaen gleientiaid dargedig. O ganlyniad, bydd hyn yn helpu i gryfhau eich presenoldeb yn y farchnad honno. Ar ôl rhoi’r prosesau hyn ar waith un waith, bydd camu i mewn i farchnad newydd arall wedyn yn broses haws ac yn fwy syml.

Angen cefnogaeth arbenigol?

Felly, os ydych chi eisiau cyfathrebu’n effeithiol gyda’ch sylfaen gwsmeriaid newydd, osgoi dirwyon a gwarchod eich enw da yn ogystal â thyfu’n gyson mewn marchnadoedd targedig eraill, yna bydd gwasanaethau cyfieithu yn fuddsoddiad hanfodol i sicrhau llwyddiant.

Gall ein tîm o arbenigwyr yn Bla eich helpu chi i wneud union hynny, boed ydych chi’n targedu marchnadoedd Ewropeaidd neu’n ceisio cyfleoedd busnes ymhellach fyth, cysylltwch â ni i drafod eich gofynion:

business@bla-translation.co.uk

Pa mor dda ydych chi’n chwarae’r gêm?

Rydym am i chi feddwl am The Traitors, y rhaglen deledu Saesneg yr ydym ni’n ffans brwd ohoni yma yn Bla. Er mwyn chwarae’r gêm, caiff dau chwaraewr eu dewis fel Bradwyr, ac mae gofyn i’r chwaraewyr eraill (sef y “Ffyddloniaid”) geisio dal y Bradwyr cyn y ‘gêm olaf’ lle mae yna arian mawr i’w ennill. Mae’r gêm seicolegol hon yn dangos sut mae pobl yn magu ymddiriedaeth gyda dieithriaid. Er mwyn llwyddo, rhaid i’r Bradwyr ymddangos yn ffyddlon ac ennill ymddiriedaeth y chwaraewyr ffyddlon eraill.

Gwers y gêm hon yw bod cyfathrebu, neu gyfathrebu strategol yn fwy penodol, yn helpu’r Bradwyr i fagu perthnasoedd ymddiriedus gyda’r chwaraewyr eraill. Heb ymddiriedaeth rhyngddynt, bydd y chwaraewyr yn siŵr o gael eu ‘llofruddio’. Felly, yr unig ffordd i’r Bradwyr ei gwneud hi i’r diwedd ac ennill yr arian yw drwy ddeall eu cynulleidfa ac addasu eu dulliau cyfathrebu wrth ymateb i sefyllfaoedd annisgwyl sy’n codi drwy gydol y gêm.

Yr un egwyddorion sy’n berthnasol i waith cysylltiadau cyhoeddus hefyd. Mae magu ymddiriedaeth gyda’r rhai y mae’r ymgyrch yn eu targedu yn rhywbeth mae’r arbenigwyr yn ei wneud yn fwriadol. Felly, mae llwyddiant yr ymgyrch yn dibynnu ar raddfa’r ymddiriedaeth a pharch sydd wedi datblygu gyda’r gynulleidfa fwriadedig.

Does dim dwywaith amdani, felly, bod iaith yn gwneud cyfraniad syfrdanol at waith cysylltiadau cyhoeddus. Wrth ddylunio ymgyrchoedd, rhoddir ystyriaeth ofalus i dôn llais, naws y neges a’r geiriau a ddefnyddir er mwyn sicrhau bod pethau’n teimlo’n ‘iawn’ a bod y neges yn taro deuddeg. Os nad yw pobl yn teimlo eu bod yn gallu uniaethu â’r neges, yna bydd pobl yn troi clust fyddar iddi.

A dyma ystyried felly y rôl mae cyfieithu yn ei chwarae mewn ymgyrchoedd ac fel rhan o waith ymgyrchu, a’r buddion lu mae’n ei gynnig. Os anwybyddir rôl cyfieithu, yna gall y canlyniadau fod yn ddifrifol:

• Llai o ymddiriedaeth neu ddim o gwbl
• Llai o effaith emosiynol
• Llai o sylw/ymgysylltu â’r ymgyrch
• Effaith yn is
• Niwed i enw da

Heb amheuaeth, mae cyflwyno ymgyrch heb fod yn iaith gyntaf eich cynulleidfa darged yn cael effaith negyddol ar y berthynas ymddiriedus yr ydych chi’n ceisio ei magu, gan gael llai o effaith emosiynol ar y rheini yr ydych chi’n eu targedu. Golyga hynny fod llai o bobl yn cymryd sylw o’r ymgyrch gan effeithio ar ba mor lwyddiannus ydyw. Yn ogystal, mae’n bosibl y byddwch chi’n dioddef o niwed i’ch enw da drwy fethu â chydnabod a pharchu iaith frodorol a diwylliant unigryw eich cynulleidfa darged.

Yma yn Bla, rydym eisiau eich helpu chi i lwyddo yn eich gwaith cysylltiadau cyhoeddus ac ymgyrchoedd. Drwy dynnu ar sgiliau iaith arbenigol ein tîm, gallwn eich cefnogi chi i sicrhau bod eich neges yn taro’r nodyn cywir ac yn cyflawni’r effaith fwriadedig.

Ac mae gennym ni gefndir llwyddiannus o wneud hynny. Rydym wedi gweithio ar brosiectau lu gyda chwmnïau cysylltiadau cyhoeddus eraill, o ymgyrchoedd cenedlaethol ar yr amgylchedd, iechyd, busnes, natur ac ymgyrchoedd marchnata. Rydym yn cynnig gwasanaeth cyflym, ymatebol ac yn darparu cyfieithiadau cywir ar gyfer eich holl waith ymgyrchu a chysylltiadau cyhoeddus.

Os ydych chi’n chwilio am ddarparwr gwasanaeth cyfieithu a all gynnal yr un cyflymdra â chi, sy’n cwblhau tasgau yn brydlon ac sy’n sicrhau bod eich negeseuon yn argyhoeddiadol ym mhob iaith, cysylltwch â ni heddiw a rhowch syniad i ni o’ch anghenion.

Gallwch chi ymddiried ynom ni fel eu bod nhw’n gallu ymddiried ynoch chithau.

Gydag Etholiad y Senedd ar y gweill, mae nifer o sefydliadau yng Nghymru wedi bod yn gweithio ar eu polisïau a’u maniffestos eu hunain. Dyma’r adeg ddelfrydol i gynnig syniadau newydd, dangos tystiolaeth a rhoi awgrymiadau gerbron aelodau’r Senedd a phleidiau gwleidyddol er mwyn iddynt eu hystyried cyn yr etholiad.

Boed ydych chi’n eirioli dros fyd natur a gweithredu dros yr hinsawdd, iechyd a gofal cymdeithasol, busnes a’r economi neu’r iaith Gymraeg o bosibl, gwerthfawrogwn pa mor bwysig ydyw eich bod yn mynegi’ch blaenoriaethau a’ch bod yn teimlo bod y rhai sy’n gwneud y penderfyniadau yn gwrando ar beth sydd gennych chi i’w ddweud.

Mae sicrhau bod dogfennau pwysig o’r fath ar gael yn Gymraeg yn hollbwysig. Drwy gyflwyno fersiynau dwyieithog o’ch cynigion, rydych chi’n dangos hygyrchedd, dealltwriaeth o’r cyd-destun dwyieithog, cryfhau’ch dylanwad ac yn hyrwyddo cynhwysiant, yn ogystal â chynnal credadwyedd eich sefydliad.

Dros y rhai wythnosau diwethaf, rydym wedi cael sawl cais cyfieithu gan wahanol sefydliadau yng Nghymru sy’n awyddus i gyfieithu eu maniffesto cyn Etholiad y Senedd ar 7fed Mai 2026.

Os ydych chithau hefyd yn bwriadu cyflwyno maniffesto eich hun ac eisiau cymorth gyda chyfieithu, yna cysylltwch â’n tîm drwy bwyso yma a bydd rhywun yn cysylltu’n ôl â chi cyn pen 24 awr.

Ers ymuno â’n tîm fel Cyfieithydd dan Hyfforddiant ym mis Medi 2024, mae Elin wedi bod yn dilyn rhaglen hyfforddiant wedi’i theilwra yn arbennig i’w sgiliau hi gan ein Rheolwr Ansawdd, Nerys. Mae llawer o’r hyfforddiant hwnnw yn digwydd yn naturiol yn ystod ei swydd bob dydd, yn cwblhau gwahanol dasgau cyfieithu ar gyfer ein sylfaen gleientiaid eang yma yn Bla. Nerys sy’n gyfrifol am adolygu ei gwaith cyfieithu ar y cyfan, gyda pheth gefnogaeth gan ein Huwch-gyfieithwyr eraill hefyd. Caiff Elin adborth adeiladol ar ei gwaith i sicrhau ei bod hi’n parhau i ddatblygu a chryfhau ei galluoedd ieithyddiol naturiol.

Dechreuodd Elin astudio cwrs Cyfieithu Proffesiynol ym Mhrifysgol Aberystwyth ym mis Medi 2025, ac felly caiff gydbwysedd iach o hyfforddiant galwedigaethol ac academaidd. Mae’r cwrs hwn, ynghyd â’i phrofiad ymarferol, yn ei helpu i bontio’r bwlch rhwng damcaniaeth a rhoi ei dealltwriaeth ar waith yn y byd go iawn ar gyfer cleientiaid go iawn.

A hithau wastad yn rhoi o’i gorau i wneud cynnydd cyson yn ei swydd, dydi Elin yn bendant ddim y teip i guddio rhag cyfle i ddysgu rhywbeth newydd! Yn ddiweddar, mynychodd weithdy ‘Cywiro Drafft’ a gyflwynwyd drwy Gymdeithas Cyfieithwyr Cymru. Yn y gweithdy, cafodd archwilio amrywiol agweddau ar waith Cyfieithydd, fel:

• Technegau i greu copi drafft gorffenedig, cywir, a sicrhau ei fod yn llifo’n naturiol yn Gymraeg
• Ymgymryd â phersbectif y ‘darllenydd’ wrth weithio ar gyfieithiadau
• Adolygu copïau sydd wedi’u cyfieithu ymlaen llaw, gan gyfrannu ffyrdd o wella cysondeb, terminoleg ac ati
• Amrywiol adnoddau defnyddiol
• Cyngor ymarferol i’r rhai a oedd yn mynychu’r sesiwn.

Fel Cyfieithydd dan Hyfforddiant, mae’n bwysig bod Elin yn manteisio ar bob cyfle i wella a datblygu’n broffesiynol. Er mai’r hyfforddiant mae hi’n ei gael yn y cwmni fydd yn allweddol i’w llwyddiant i raddau helaeth, mae’r cyfle i ddysgu gan arbenigwyr y tu hwnt i’n tîm hefyd yn werthfawr i gyflwyno dealltwriaethau ffres i’w hymarfer.

Dyma rai sylwadau gan Elin ynghylch y gweithdy:

“Dyma oedd cyfle i gael awgrymiadau ymarferol ar sut i gynhyrchu testun gorffenedig cywir, sy’n llifo’n naturiol. Cefais gyfle i wneud nodiadau fy hun am elfennau i’w gwella mewn cyfieithiadau a ddewiswyd yn benodol i’r sesiwn ac yna gwrando ar argymhellion gweddill y grŵp. Cafodd awgrymiadau, adnoddau, cyngor a syniadau gwerth chweil eu rhannu gan y tiwtor a’r grŵp!”

Mae Elin yn enghraifft wych o unigolyn proffesiynol ifanc sydd wastad yn rhoi o’i gorau er mwyn symud yn ei blaen. Yn ogystal â hynny, mae hi’n cynrychioli’r cyfleoedd gwaith o ansawdd sydd i’w cael i’r rheini sy’n frwd dros hyrwyddo’r iaith Gymraeg.

Gyda’r Nadolig wedi hen fynd heibio a’r Flwyddyn Newydd wedi dechrau, rydym ni i gyd wedi dychwelyd at ein desgiau yma yn Bla, ac yn edrych ymlaen at flwyddyn brysur arall!

2025 oedd un o’r blynyddoedd prysuraf i ni fel cwmni. Gwnaethom barhau i gefnogi ein sylfaen gleientiaid bresennol, y mae rhai ohonynt wedi gweithio efo ni ers blynyddoedd lu, ac fe wnaethom hefyd groesawu cleientiaid newydd sydd wastad yn hynod gyffrous. Hoffem ddiolch yn fawr iawn i’n holl gleientiaid, hen a newydd, am barhau i ymddiried ynom fel eu darparwyr gwasanaeth cyfieithu!

Un datblygiad nodedig arall yn ystod 2025 oedd y cynnydd da iawn yn nifer y ceisiadau cyfieithu ar gyfer ieithoedd eraill y tu hwnt i’n cynnig traddodiadol Saesneg <> Cymraeg. Gwelsom dros 100% o gynnydd yn nifer y ceisiadau o’r fath, ac yn sicr mae hynny wedi cadw ein tîm Bla2 yn brysur. Dyma obeithio am fwy o gynnydd eto fyth eleni!

Mae dechrau blwyddyn newydd yn amser gwych i oedi a myfyrio ar bethau. Mae’n adeg pan mae pobl yn ail-asesu eu blaenoriaethau ac yn gosod nodau newydd iddyn nhw eu hunain. Ac nid unigolion yn unig sy’n gallu gwneud hyn; gall busnesau gymryd rhan hefyd. Os ydy chwilio am ddarparwr gwasanaeth cyfieithu (newydd) yn un o’ch addunedau Blwyddyn Newydd, yna rydych chi wedi dod i’r lle cywir! Dyma eich atgoffa o’r hyn y bydd angen i chi ei wneud nesaf mewn 3 cham syml:

1. Cysylltwch â ni drwy lenwi ein ffurflen gyswllt ar ein gwefan sydd i’w chael yma
2. Rhowch ychydig o wybodaeth gefndirol i ni, syniad o’ch gofynion cyfieithu ac unrhyw gwestiynau yr hoffech chi eu gofyn i ni
3. Gallwch chi hefyd atodi dogfen wrth gysylltu â ni drwy ein ffurflen gyswllt pe hoffech roi rhagor o syniad i ni o’r math o ddogfennau ydych chi’n gweithio gyda nhw

Bydd un o’n tîm cyfeillgar yn cysylltu’n ôl cyn pen 24 awr. Dydi dod o hyd i ddarparwr gwasanaeth cyfieithu dibynadwy erioed wedi bod mor syml!

Edrych ymlaen at glywed gennych yn fuan!

Mae pob diwydiant yn dioddef o gamsyniadau, yn enwedig ein diwydiant cyfieithu nad yw’n cael y sylw na’r gwerthfawrogiad mae’n ei haeddu. Yma, hoffem daflu goleuni ar y camsyniadau mwyaf cyffredin ynghylch diwydiant cyfieithu Cymru yn benodol. Y gobaith yw y gallwn egluro isod beth yn union sy’n digwydd mewn practis cyfieithu proffesiynol:

“Os allwch chi siarad Cymraeg, yna gallwch chi gyfieithu”

Anghywir.

Nid yw’r gallu i siarad Cymraeg yn golygu eich bod chi’n meddu ar y gallu ieithyddol hynod ddatblygedig i gyfieithu i’r Gymraeg neu ohoni yn ramadegol gywir – hyd yn oed os ydych chi’n rhugl neu’n Gymraeg iaith gyntaf.

Rydym yn clywed am achosion lu o sefydliadau yn gofyn i’w cyflogeion sy’n gallu siarad Cymraeg i gyfieithu pethau ar eu rhan. Nid yn unig y mae hyn yn annheg gan eich bod yn gofyn i’ch cyflogai wneud tasg nad ydyw’n gymwys i’w gwneud mewn gwirionedd, ond gall hefyd arwain at nifer o broblemau. Peidiwch â dibynnu ar siaradwr Cymraeg yn eich cwmni i gyfieithu i chi dan unrhyw amgylchiadau.

Mae cyfieithu yn wasanaeth proffesiynol sy’n cael ei gynnig gan arbenigwyr a’r rheini wedi buddsoddi’n fawr yn eu crefft. Ewch draw i’n ffurflen gyswllt i amlinellu’ch gofynion a bydd un o’n cynghorwyr mewn cyswllt â chi cyn pen 24 awr i drafod sut allwn eich cefnogi chi.

“Does dim pwynt cyfieithu i’r Gymraeg achos mae pawb yn deall Saesneg”

Oni bai eich bod chi’n gorff cyhoeddus yng Nghymru, nid oes yna rwymedigaeth gyfreithiol arnoch i sicrhau bod eich gohebiaeth yn ddwyieithog. Wedi dweud hynny, yma yn Bla rydym yn gweithio gyda sawl sefydliad nad oes gofyn cyfreithiol arnynt i weithredu’n ddwyieithog ond sy’n dewis gwneud hynny oherwydd eu bod yn ymwybodol o’r buddion lu sy’n dod law yn llaw â hynny:

• Cysondeb yn llais eich brand
• Ennill cefnogaeth gan gwsmeriaid Cymraeg eu hiaith
• Gwella ymwybyddiaeth o’ch brand
• Lefel uchel o gywirdeb oherwydd eu bod yn defnyddio practis cyfieithu proffesiynol
• Arddangos bod eich brand yn gwerthfawrogi gwahanol ddiwylliant.

A phwy a ŵyr, efallai y bydd gofyniad cyfreithiol ar bob sefydliad i weithredu’n ddwyieithog yn y dyfodol? Byddai’n syniad dechrau arni heddiw er mwyn eich rhoi ar y droed flaen.

“Ai dim ond cyfieithu gair am air ydych chi?”

Na. Dim o gwbl. Mae cyfieithu yn grefft sy’n gofyn lefel uchel o sgiliau ieithyddol. Mae ein Cyfieithwyr wedi bod yn hyfforddi ac yn ymarfer eu sgiliau ers blynyddoedd ac yn parhau i wneud hyd heddiw.

Er mwyn bod yn Gyfieithydd, mae angen i chi feistroli sgiliau amrywiol: gwybodaeth drylwyr o reolau gramadegol, llygad am fanylder, gallu technegol da, sensitifrwydd o gyfeiriadau diwylliannol, ymwybyddiaeth o ddeddfwriaeth iaith, proffesiynoldeb etc. Mae’r rhain yn gofyn gwaith caled a datblygiad proffesiynol parhaus er mwyn eu perffeithio.

Ein nod wrth gyfieithu i’r Gymraeg yw sicrhau nad yw’r cyfieithiad yn swnio fel cyfieithiad. Yn hytrach, dylai ddarllen fel dogfen a gafodd ei hysgrifennu’n Gymraeg yn wreiddiol, yn gwbl annibynnol ar y Saesneg. Mae yna sawl ffactor sy’n cyfrannu at gyfieithiad llwyddiannus: y gynulleidfa darged a phwrpas y ddogfen, natur y ddogfen, strwythur gramadegol, cysondeb a chywirdeb etc. Bydd y rhain i gyd (a mwy) yn mynd drwy ben Cyfieithydd cyn dechrau ar y gwaith cyfieithu ei hun.

Os ydych chi’n credu bod cyfieithu yn golygu trosi gair am air, yna does dim dwywaith amdani eich bod chi’n mynd i fethu.

“Pam ydych chi’n trafferthu cyfieithu i’r Gymraeg? Mae’r iaith yn marw ar ei thraed”

Credwch chi ni, nid yw’r iaith Gymraeg yn marw. Yma yn Bla, rydym yn cyfieithu ar gyfartaledd tua 150,000 o eiriau o’r Saesneg i’r Gymraeg bob wythnos (ychydig o’r Gymraeg i’r Saesneg hefyd), sy’n dangos bod yna alw mawr am wasanaeth cyfieithu Cymraeg.

Er ein bod yn cydnabod bod yna heriau yn wynebu’r iaith, rydym yn hyderus yn yr ymdrechion sydd ar waith i sicrhau dyfodol llewyrchus i’n hiaith.

“Mae gwasanaeth cyfieithu yn ddrud”

Isel iawn yw’r gost am wasanaethau cyfieithu pan fyddwch chi’n meddwl am yr holl broblemau a all godi os nad ydych chi’n buddsoddi mewn gwasanaeth cyfieithu priodol.

Heb wneud hynny, gallai eich deunyddiau ysgrifenedig gael eu camddeall, eu camddehongli neu fod yn gamarweiniol. Gallai’r holl bethau hyn arwain at broblemau cyfreithiol, materion cydymffurfio, oedi heb fod angen, anfodlonrwydd ymhlith eich cleientiaid a’ch staff, yn ogystal â gwneud drwg i’ch enw. Dyma bethau a all fod yn ddrud iawn i’w datrys.

Mae gwasanaeth cyfieithu yn fuddsoddiad hollbwysig er mwyn osgoi gwariant dianghenraid.

Rydym yn falch o gyhoeddi bod ein Rheolwr Busnes, Anna, wedi cyfrannu at rifyn diweddaraf yr ITI Bulletin, sef cylchlythyr busnes yr Institute of Translation and Interpreting.

Yn ei herthygl, myfyria Anna ar ei thaith fel rhan o’n tîm dros y saith mlynedd diwethaf – cyfnod o newid mawr i’r busnes. Gan gynnig cip y tu ôl i’r llen yma yn Bla, nid yn unig mae hi’n amlinellu esblygiad y cwmni ond hefyd ei gyrfa yn y diwydiant cyfieithu.

Un o’r newidiadau amlycaf hynny wrth gwrs yw cyflwyno gwasanaeth newydd, sef Bla₂, a gyhoeddwyd ar ddechrau 2024, yn cynnig gwasanaeth cyfieithu i amrywiol ieithoedd rhyngwladol. O Bwyleg, Arabeg, Ffrangeg a Rwmaneg i enwi rhai ohonynt, gallwn ni nawr gynnig cyfieithiadau yn y rhan fwyaf o ieithoedd Ewrop. Testun balchder i ni yw dweud bod Bla₂ yn prysur ennill momentwm gyda phortffolio cynyddol o gleientiaid.

Yn amlwg, daw hyn i gyd heb unrhyw effaith ar ein cynnig gwasanaeth cyfieithu i’r Gymraeg, sy’n parhau fel gwasanaeth ar wahân. Mae’r galw am ein harbenigedd yn yr iaith Gymraeg wedi cynyddu, gan gadw ein tîm yn brysur tu hwnt a hoffem ddiolch o galon am bob cefnogaeth.

Does dim dwywaith bod ein tîm yn teimlo’n gryf iawn dros ieithoedd a gobeithiwn fod y safonau uchel yr ydym yn eu cynnal ar draws yr holl wasanaethau a gynigiwn yn dangos ein balchder yn ein gwaith.

Heb ddarllen erthygl Anna?

Os nad ydych chi eisoes wedi darllen erhygl Anna, a fydd yn rhoi syniad i chi o sut mae pethau wedi datblygu yma yn Bla dros y blynyddoedd diwethaf, yna mae modd gwneud hynny drwy bwyso yma.