Mae ein blog diweddaraf yn taflu goleuni ar ymarfer cyfieithu. Gellid dadlau yr ystyrir cyfieithu fel rhywbeth syml lle caiff geiriau eu cyfieithu o’r naill iaith i iaith arall. Gwir – i raddau. Yn y blog hwn, dyma drafod ychydig ar ein gwaith, ei bwysigrwydd a sut mae llawer mwy iddi! Gadewch i ni ddangos enghraifft i chi o gais cyfieithu a gawsom yn ddiweddar:

Please can you translate the following?

Walk

Ar yr olwg gyntaf, efallai fod hon yn eich taro fel tasg digon syml. Efallai y byddai eich cydweithiwr Saesneg yn troi atoch ac yn gofyn i chi “what’s ‘walk’ in Welsh?”, a byddai’n naturiol i chi ateb yn dweud “cerdded”. Dim ond un gair ydi o. Beth all fynd o’i le?

Byddai Cyfieithydd cymwys yn edrych ar y cais hwn ac yn ei weld yn berygl bywyd. Mae yna gymaint o bethau ieithyddol a all fynd o chwith yma. Gadewch i ni edrych ar rai o’r cwestiynau fyddai’n corddi yn ein meddyliau:

Ai geiryn sy’n gweithredu fel enw Saesneg yw hwn? “I’m going for a walk”

Ai gorchymyn ydyw? “Get up and walk”

Ai enw llwybr cerdded ydyw? “Let’s follow Torrens Walk path”

A oes yna gyd-destun ehangach i’r geiryn hwn? “Join us on this walk tomorrow!”

Mae’r cwestiynau hyn i gyd yn arwain at gyfieithiad cwbl wahanol. Yn yr achos hwn, fodd bynnag, cawsom gyd-destun gan y cleient a oedd yn egluro’r ystyr yn well i ni fel bod modd cynnig y cyfieithiad mwyaf priodol ac addas.

Wedi dweud hynny, y neges yma yw pwysigrwydd troi at Gyfieithydd proffesiynol! Yn yr un modd ag y byddech chi’n meddwl dwywaith cyn tynnu’ch dant gartref, peidiwch â mynd ati i gyfieithu heb gael cyngor gan arbenigwr iaith ac, yn bwysicach fyth, dywedwch wrth eich cydweithwyr am beidio â dibynnu arnoch chi i gyfieithu dim ond oherwydd eich bod chi’n siaradwr Cymraeg! Mae gofyn i siaradwyr Cymraeg, nad ydynt yn Gyfieithwyr, yn gwneud lle ar gyfer camgymeriadau a all ddenu sylw drwg at eich brand.

Cofiwch: mae cyfieithiad gwael yn gwneud mwy o ddrwg na dim cyfieithiad o gwbl!

Mynychodd Alun, ein cyfarwyddwr, gynhadledd yr ITI (Institute of Translation and Interpreting) yn ninas wych Caeredin yr wythnos ddiwethaf. Yn ôl yr arfer roedd yn gyfle i weld hen ffrindiau unwaith eto a chreu cysylltiadau proffesiynol newydd yn y maes, yn ogystal â mwynhau ystod eang o gyflwyniadau.

Mae’r byd cyfieithu yn parhau i gadw llygad barcud ar ddatblygiadau mewn ‘Deallusrwydd Artiffisial’ yn y proffesiwn ac yn poeni am beth all hyn ei olygu i ddyfodol cyfieithwyr dros y blynyddoedd nesaf wrth i ni ddibynnu’n ormodol ar beiriannau. Cafwyd themâu eraill hefyd, gan gynnwys pwysigrwydd y cyfryngau cymdeithasol yn ein gwaith, brandio a hyrwyddo, prisiau a chyfraddau tâl, a hyd yn oed sesiwn ar yr heriau wrth geisio cyfieithu rhegfeydd o un iaith i’r llall!

Rhwng dydd Llun 13 Mai a dydd Gwener 17 Mai dathlwn Wythnos y Cynnig Cymraeg! Ardystiad swyddogol yw hwn a gynigir gan Gomisiynydd y Gymraeg i sefydliadau sy’n dangos ymroddiad ffurfiol i ddatblygu’r Gymraeg ac sy’n ymfalchïo yn eu defnydd o’r iaith. Yn Bla, cawsom ein dyfarnu â’r Cynnig Cymraeg ym mis Medi 2023. Gwyddom fod rhai o’n cleientiaid wedi mynd ati i ennill y Cynnig Cymraeg, ac os oes gennych chi awydd gwneud yr un fath, yna mae croeso i chi gysylltu â ni i’ch cynorthwyo gyda’ch gwaith cyfieithu. Ceir rhagor o fanylion ynghylch y Cynnig Cymraeg yma.

Oherwydd twf a galw parhaus am ein gwasanaethau, rydym yn awyddus i recriwtio aelodau brwdfrydig newydd i ymuno â’n tîm gweithgar. Dyma’r swyddi gwag diweddaraf yn Bla:

• Cyfieithwyr Cymraeg (parhaol, llawn amser yn ddelfrydol ond rydym yn agored i drafod gyda’r ymgeisydd delfrydol)
• Cyfieithydd dan Hyfforddiant (contract am flwyddyn, gyda’r nod o benodi’n Gyfieithydd ar y diwedd)
• Swyddog Datblygu Busnes (parhaol, llawn amser yn ddelfrydol ond rydym yn agored i drafod gyda’r ymgeisydd delfrydol)

Ceir rhagor o wybodaeth ynghylch pecynnau’r swyddi hyn drwy gysylltu ag Alun: alun@bla-translation.co.uk neu 01248 725 730.

Gweler yma yr hyn a gewch yn gyfnewid am eich gwaith caled yn Bla.

Deallusrwydd Artiffisial, sydd hefyd yn cael ei alw’n ‘AI’, yw pwnc llosg y diwydiant cyfieithu yn fyd-eang! Gyda sawl mantais ac anfantais, mae ‘AI’ yn gwneud gwaith da o gorddi’r dyfroedd ym myd ieithyddion – rydych chi naill ai’n gwirioni gydag ‘AI’ neu’n ei gasáu.

Cyn dewis eich ochr fodd bynnag, pwysig yw gosod ‘AI’ mewn cyd-destun. Gall fod yn ddefnyddiol ar adegau ac yn gur pen o bryd i’w gilydd. Cliciwch yma i ddarllen erthygl Alun a gyhoeddwyd ym mwletin yr ITI, lle mae’n plymio’n ddyfnach i fyd ‘AI’ ym maes cyfieithu.

Ydych chi eisiau ehangu eich sylfaen gleientiaid? Efallai eich bod chi ar drywydd cryfhau perthnasoedd yr ydych eisoes wedi’u magu? Neu’ch bod yn gweithio ar ymgyrch i sefydlu ymhellach eich brand unigryw?

Os allwch chi uniaethu â’r cwestiynau hyn, yna mae’n debyg eich bod chi eisoes wedi ystyried defnyddio practis cyfieithu. Neu efallai ddim? Yn aml, mae cyfieithu yn rhywbeth sy’n cael ei anghofio mewn busnes, ar waelod yr agenda neu’n rhywbeth i chi ei ystyried ‘yn y dyfodol’ efallai (a hynny byth yn digwydd!). Felly, y cwestiwn yr ydym ni’n ei ofyn ydi ‘a ydi cyfieithu wir yn angenrheidiol?’.

Wel, mae’r ateb i’r cwestiwn hwnnw yn dibynnu ar eich nodau a’ch uchelgeisiau. I’ch helpu chi i lywio’r cwestiwn hwn, dewch i ni edrych ar 5 prif fantais gwasanaethau cyfieithu:

1. EHANGU BUSNES – Cyfieithu yw’r llwybr carlam tuag at gyrraedd cynulleidfa ehangach, er mwyn i chi allu ymestyn eich sylfaen gleientiaid a chyfathrebu gyda nhw yn eu mamiaith, gan annog teyrngarwch sydd, yn ei dro, yn arwain at gwsmeriaid yn dychwelyd
2. YMWYBYDDIAETH DDIWYLLIANNOL – Mae dangos ymwybyddiaeth ddiwylliannol ym myd busnes yn amhrisiadwy er mwyn gallu apelio at emosiynau eich cynulleidfa darged. Bydd deallusrwydd emosiynol da yn eich helpu chi i ennill cefnogaeth gan gleientiaid hen a newydd yn ogystal â’ch staff gan eich bod yn parchu eu gwerthoedd, eu traddodiadau a’u hiaith sydd mor bwysig iddynt
3. CYSONDEB – Dyma’r gair allweddol ym myd cyfieithu. Gellir dadlau mai dyma’r elfen bwysicaf wrth gyfathrebu – mae cysondeb yn hollbwysig er mwyn cyfleu negeseuon clir a gallu ymwneud yn effeithiol â’ch cynulleidfa
4. CYWIRDEB – Gall cyfieithiadau anghywir achosi mwy o niwed i’ch brand na pheidio â chyfieithu o gwbl. Cofiwch droi at gyfieithwyr proffesiynol er mwyn osgoi gwallau a all ddenu’r math anghywir o sylw
5. CRYFHAU BRAND – Mae cryfhau brand yn her barhaus mewn busnes. Rhaid i chi dalu’r sylw y mae eich brand yn ei haeddu er mwyn llwyddo. Mae cyfieithu yn rhan hollbwysig o hynny, er mwyn sicrhau profiad cadarnhaol i’ch cleientiaid, a fydd yn rhoi’r droed flaen i chi yn erbyn cystadleuwyr.

A ninnau’n gyfieithwyr proffesiynol, mae gennym brofiad o weld yn uniongyrchol gwir fuddion cyfieithu i sefydliadau o bob math a maint. O elusennau bach sy’n gweithio mewn ardal benodol i gwmnïau aml-wladol sy’n gweithredu mewn sawl gwlad – yr un yw’r manteision. Ein hiaith yw ein caffaeliad pennaf, felly manteisiwch ar ein harbenigedd ni fel ieithyddion i gefnogi’ch cenhadaeth.

Os ydych chi am wneud y mwyaf o 5 mantais cyfieithu fel y’u hamlinellir uchod, yna dylai bod cyfieithu ar frig unrhyw agenda neu strategaeth. Felly, beth amdani, ydy cyfieithu wir yn angenrheidiol?

Am wasanaeth cyfieithu proffesiynol, cywir a chyson, cysylltwch â ni heddiw.

Cyfieithiadau Cymraeg – office@bla-translation.co.uk

Cyfieithiadau ieithoedd rhyngwladol – anna@bla-translation.co.uk

Ymhlith y traddodiadau bach yr ydym ni wedi’u magu yma yn Bla mae ein casgliad hynod arbennig o fagnedau.

Bob hyn a hyn, mae ein staff yn mwynhau dianc rhag pwysau bywyd bob dydd, ymlacio a gollwng ychydig o stêm. A pha ffordd well o wneud hynny na phacio bag a’i throi hi am y maes awyr?!

Gall y diwydiant cyfieithu gynnig gyrfa werth chweil ond gyda gofynion amrywiol brosiectau yn tynnu’n groes, nid yw’n swydd i’r gwangalon! Mae treulio amser ar wyliau gyda theulu a ffrindiau yn rhywbeth yr ydym ni i gyd yma yn mwynau ei wneud yn ystod ein gwyliau blynyddol haeddiannol. O dorri syched gyda choctel yn y canoldir, crwydro’r strydoedd mewn dinas yn Ewrop, neu fynd am antur yn ein mamwlad hyfryd, mae yna wastad wyliau bach i edrych ymlaen ato.

Mae un amod i hynny – mae’n rhaid i staff ddod â magned yn ôl gyda nhw er mwyn tystio eu holibobs. Mae ein casgliad yn tyfu gyda magnedau o gyrchfannau megis Llangollen a Latfia, Panama a Phortiwgal, ac Amsterdam ac Abertawe!!

Os nad oes magned ar yr oergell, yna aethoch chi ddim ar wyliau!! Y cwestiwn hollbwysig nawr ydy: i le’r yn y byd yr awn ni nesaf?

“Cabin crew, prepare for landing”!

Cafodd Alun gyfarfod buddiol iawn dros ginio efo Sara Robertson, Prif Weithredwr yr ITI (Institute of Translation and Interpreting), yng Nghaer ddydd Llun 15 Ebrill. Fel pennaeth y prif gorff proffesiynol sy’n cefnogi cyfieithwyr o bob iaith ym Mhrydain, a thu hwnt, roedd Sara yn awyddus i gael mwy o gefndir ynghylch sut mae cwmni fel Bla wedi datblygu a thyfu, a thrafod y daith o gychwyn fel cyfieithydd hunangyflogedig at redeg cwmni prysur a llwyddiannus. Roedd yn gyfle hefyd i Alun gael gwybod mwy am ddyheadau’r ITI a’r heriau sy’n wynebu’r maes cyfieithu dros y blynyddoedd nesaf.

Diwrnod Rhyngwladol y Merched hapus gan bawb yn Bla!

Rydym yn ffodus iawn o gael merched mor anhygoel yn rhan o’n tîm – ac am ran maen nhw’n ei chwarae hefyd! Mewn gwirionedd, mae 88.889% o’n gweithlu yn Bla yn ferched!

Rydym yn gwerthfawrogi eich cefnogaeth yn arw iawn.

Dyma Elena sydd wedi ymuno â’n tîm yn Bla fel Uwch-gyfieithydd. Yn y gorffennol, mae Elena wedi bod yn gweithio yn Llyfrgell Genedlaethol Cymru ac mae wedi bod yn olygydd hefyd. Gyda chyfoeth o brofiad, mi fydd yn siŵr o wneud cyfraniad gwerth chweil at ein cwmni. Croeso mawr, Elena!

Ewch draw i’n tudalen staff i gael gwybod mwy am Elena a gweddill y tîm anhygoel sydd gennym yn Bla.